އިނގިރޭސި ޕްރިމިއާ ލީގުގައި ރޭ ކުޅުނު މެޗުން ޗެލްސީ އަތުން 2-0 އިން ބަލިވެ، މެންޗެސްޓާ ޔުނައިޓެޑް ރެލިގޭޝަނުން ސަލާމަތްވުމުގެ ހަނގުރާމައަކާ ކުރިމަތިލާން ޖެހިއްޖެ އެވެ. ފަހަކަށް އައިސް ކުޅުނު ފަސް މެޗުގެ ތެރެއިން ހަތަރު މެޗުން ބަލިވެފައިވާ ޔުނައިޓެޑަށް މި ނަތީޖާއާއެކު އިތުރު ޕްރެޝަރަކާ ވަނީ ކުރިމަތިލާން ޖެހިފަ އެވެ.
ސްޓެމްފޯޑް ބްރިޖުގައި ކުޅުނު މި މެޗުގެ ފުރަތަމަ ހާފުގައި ޔުނައިޓެޑަށް ލަނޑު ޖަހާނެ ރަނގަޅު ފުރުސަތުތަކެއް ލިބުނެވެ. އެގޮތުން އަމަދު ޑިއާލޯ އަށް ލިބުނު ތިން ފުރުސަތާއި ކެޕްޓަން ބްރޫނޯ ފެނާންޑޭސް އަށް ލިބުނު ފުރުސަތު ފާހަގަކޮށްލެވެ އެވެ. ނަމަވެސް، ދެވަނަ ހާފު ފެށިގެން ހަތަރުވަނަ މިނެޓުގައި ޗެލްސީގެ މޯގަން ރޮޖާސް ވަނީ ޔުނައިޓެޑުގެ ޑިފެންސަށް ހެދުނު ގޯހެއްގެ ފައިދާ ނަގައި އެ ޓީމަށް ލީޑު ނަގައިދީފަ އެވެ.
ޔުނައިޓެޑުގެ ހާލަތު އިތުރަށް ގޯސްވީ ޗެލްސީގެ ވެސްލީ ފޮފާނާ އަށް ކުރި ފައުލަކާ ގުޅިގެން ލިސަންދުރޯ މާޓިނޭޒަށް ދެވަނަ ރީނދޫ ކާޑާއެކު ރަތް ކާޑު ދައްކައި ދަނޑުން ފޮނުވާލުމުންނެވެ. އެ ފައުލާ ގުޅިގެން ޗެލްސީ އަށް ލިބުނު ޕެނަލްޓީ ކޯލް ޕާމާ ކާމިޔާބުކޮށް، މެޗުގެ ފަހު 28 މިނެޓު 10 ކުޅުންތެރިންނާއެކު ކުޅުނު ޔުނައިޓެޑުގެ މައްޗަށް ދެ ލަނޑުގެ ލީޑެއް ކަށަވަރުކުރި އެވެ.
މި ނަތީޖާއާއެކު މައިކަލް ކެރިކްގެ އިރުޝާދުގެ ދަށުން ކުޅޭ ޔުނައިޓެޑަށް ވަނީ ހުރިހާ މުބާރާތެއްގައި މޮޅެއް ނުލިބި ނުވަ މެޗު ހަމަވެފަ އެވެ. މި ސީޒަނުގެ ލީގުގައި މިހާތަނަށް ކުޅުނު ނުވަ މެޗުން އެ ޓީމަށް ލިބިފައިވަނީ އެންމެ ހަތް ޕޮއިންޓެވެ. މިއީ 1986 ވަނަ އަހަރަށް ފަހު ލީގުގައި އެ ޓީމު މިހާ ދަށްކޮށް ފެށި ފުރަތަމަ ފަހަރެވެ.
ޔުނައިޓެޑަށް ދެން ކުރިއަށް އޮތީ ޗެމްޕިއަންސް ލީގުގައި ރޯމާއާ ދެކޮޅަށް ކުޅޭ މެޗެވެ. އެ މެޗުން މޮޅު ނުވެވިއްޖެނަމަ، އެއީ ވޭތުވެދިޔަ 75 އަހަރު ތެރޭގައި އެ ޓީމުގެ އެންމެ ދަށް ނަތީޖާގެ ރެކޯޑާ އެއްވަރުވާނެ ހާލަތެކެވެ. މީގެ އިތުރުން ލީގުގައި ދެން އެ ޓީމު ނުކުންނަން ޖެހޭނީ އެސްޓަން ވިލާއާ ދެކޮޅަށެވެ. އަދި އިންޓަނޭޝަނަލް ބްރޭކަށް ފަހު އެންފީލްޑުގައި ލިވަޕޫލާ ދެކޮޅަށް ކުޅުމަށް ވެސް ވަނީ ހަމަޖެހިފަ އެވެ.
