ޤައުމީ އެއާލައިން، މޯލްޑިވިއަންގެ ފްލީޓަށް ފުރަތަމަ ފަހަރަށް ކިންގް އެއާ 360 މަރުކާގެ ބޯޓެއް ގެނެސް، އެ އެއާލައިންގެ ޚިދުމަތްތައް ފުޅާކުރުމުގެ އައު ބާބެއް ފަށައިފިއެވެ.
ކިންގް އެއާ 360 އަކީ ޒަމާނީ އޭވިއޭޝަން ޓެކްނޮލޮޖީއާއި، އުދުހުމުގެ މަތީ ފެންވަރުގެ އިތުރުން ފަސިންޖަރުންނަށް ހިތްފަސޭހަ އަދި ފުރިހަމަ ކެބިން ތަޖުރިބާއެއް ފޯރުކޮށްދޭ ގޮތަށް ފަރުމާކޮށްފައިވާ ބޯޓެކެވެ. މޯލްޑިވިއަނުން ހާމަކުރި ގޮތުގައި މި ބޯޓަކީ އެއާލައިންގެ ކުރިއަރަމުން އަންނަ ޤާބިލުކަމަށް އިތުރުވި ފާހަގަކޮށްލެވޭ ބޮޅެކެވެ.
މޯލްޑިވިއަނުން ފާހަގަކުރި ގޮތުގައި މިއީ އެ އެއާލައިންގެ ދަތުރުފަތުރުގެ ދާއިރާއަށް ލިބުނު މުހިންމު ކުރިއެރުމެކެވެ. މި ބޯޓު ފްލީޓާ ގުޅިފައިވަނީ ނީލާ ކޮރަލް އައިލެންޑް އާއެކު ވެފައިވާ ޕާޓްނާޝިޕްގެ ދަށުންނެވެ.
މި ޕާޓްނާޝިޕްގެ މައިގަނޑު މަޤްޞަދަކީ ރާއްޖޭގެ ވައިގެ ދަތުރުފަތުރުގެ ފެންވަރު އިތުރަށް މަތިކޮށް، ފަތުރުވެރިންނަށާއި ދަތުރުވެރިންނަށް ލަގްޒަރީ ދަތުރުފަތުރުގެ ޚިދުމަތްތައް ފޯރުކޮށްދިނުމެވެ. އަދި މި ބޯޓާއެކު މޯލްޑިވިއަންގެ ޕްރީމިއަމް އަދި ޗާޓަރު ދަތުރުތަކަށް އިތުރު ފުރިހަމަކަމެއް ލިބިގެންދާނެ ކަމަށް އެ އެއާލައިނުން ފާހަގަކުރެއެވެ.
