ދުނިޔޭގެ އެންމެ ބޮޑު ޗިޕް އުފައްދާ ކުންފުނި އެންވީޑިއާއިން، އާޓިފިޝަލް އިންޓެލިޖެންސް (އޭއައި) ޗިޕް އުފެއްދުމުގައި ވާދަވެރި ގްރޮކް (Grock) ކުންފުނީގެ ޓެކްނޮލޮޖީ ބޭނުންކުރުމުގެ ލައިސަންސް އެއްބަސްވުމެއްގައި ސޮއިކޮށްފިއެވެ. މި އެއްބަސްވުމުގެ ދަށުން ގްރޮކްގެ ބާނީ ޖޮނަތަން ރޮސް އާއި އެ ކުންފުނީގެ ރައީސް ސަނީ މަދްރާގެ އިތުރުން ގިނަ އަދަދެއްގެ މުވައްޒަފުން އެންވީޑިއާއާ ގުޅޭނެއެވެ.
ސީއެންބީސީން ރިޕޯޓްކޮށްފައިވާ ގޮތުގައި އެންވީޑިއާއިން ގްރޮކްގެ އެސެޓްތައް ގަންނަނީ 20 ބިލިއަން ޑޮލަރަށެވެ. ނަމަވެސް އެންވީޑިއާއިން ޓެކްކްރަންޗަށް މައުލޫމާތު ދެމުން ބުނެފައިވަނީ މިއީ މުޅި ކުންފުނި ގަތުމުގެ މުއާމަލާތެއް ނޫން ކަމަށެވެ. މި އަދަދުތަކަކީ ސައްހަ އަދަދުތަކެއް ނަމަ، މިއީ އެންވީޑިއާގެ ތާރީޚުގައިވެސް ހިންގާ އެންމެ ބޮޑު މުއާމަލާތަށް ވާނެއެވެ. އަދި މީގެ ސަބަބުން ޗިޕް އުފެއްދުމުގެ ދާއިރާގައި އެންވީޑިއާގެ ބާރު މިހާރަށްވުރެ ބޮޑަށް ގަދަވެގެންދާނެއެވެ.
އެލްޕީޔޫ ޓެކްނޮލޮޖީގެ ކުރިއެރުން
ޓެކްނޮލޮޖީ ކުންފުނިތަކުން އޭއައިގެ ގާބިލްކަން އިތުރުކުރުމަށް މަސައްކަތް ކުރަމުންދާއިރު، އެންވީޑިއާގެ ޖީޕީޔޫތަކަކީ މިހާރު އިންޑަސްޓްރީގެ މިންގަނޑެވެ. ނަމަވެސް ގްރޮކްއިން އުފައްދާފައިވާ ”ލޭންގުއޭޖް ޕްރޮސެސިން ޔުނިޓް“ (LPU) އަކީ އާދައިގެ ޗިޕްތަކަށްވުރެ 10 ގުނަ ހަލުވިކޮށް މަސައްކަތްކުރާ އަދި ހަކަތަ ބޭނުންކުރާ މިންވަރު 10 ގުނަ ކުޑަ ޗިޕެކެވެ.
ގްރޮކްގެ ސީއީއޯ ޖޮނަތަން ރޮސްއަކީ މިފަދަ އީޖާދުތަކަށް މަޝްހޫރު ބޭފުޅެކެވެ. އޭނާ މީގެ ކުރިން ގޫގުލްގައި މަސައްކަތް ކުރެއްވި އިރު، އޭއައި މަސައްކަތްތަކަށް ޚާއްސަ ”ޓެންސަރ ޕްރޮސެސިން ޔުނިޓް“ (TPU) އީޖާދުކުރުމުގައި މުހިންމު ދައުރެއް އަދާކުރައްވާފައިވެއެވެ.
ގްރޮކްގެ ހަލުވި ކުރިއެރުން
މިދިޔަ ސެޕްޓެމްބަރު މަހު ގްރޮކްއިން ވަނީ 750 މިލިއަން ޑޮލަރުގެ އިންވެސްޓްމަންޓް ހޯދާފައެވެ. އެއާއެކު އެ ކުންފުނީގެ އަގު ވަނީ 6.9 ބިލިއަން ޑޮލަރަށް އަރާފައެވެ. ކުންފުނީގެ ތަފާސްހިސާބުތަކުން ދައްކާގޮތުގައި، މިދިޔަ އަހަރު އެ ކުންފުނީގެ ޓެކްނޮލޮޖީ ބޭނުންކުރި ޑިވެލޮޕަރުންގެ އަދަދު 356,000 ގައި ހުރިއިރު، މިހާރު އެ އަދަދު ވަނީ 2 މިލިއަނަށްވުރެ މައްޗަށް އަރާފައެވެ.
މި މުއާމަލާތާ ގުޅޭގޮތުން އެންވީޑިއާއިން ފަހުން ނެރުނު ބަޔާނެއްގައި ބުނެފައިވަނީ، މިއީ ކުންފުނި އެއްކޮށް ގަތުމުގެ ބަދަލުގައި ޓެކްނޮލޮޖީ ލައިސަންސް ކުރުމާއި މުވައްޒަފުން ހޯދުމުގެ އެއްބަސްވުމެއް ކަމަށެވެ.
