ޗައިނާގެ ހައިނާން ޕްރޮވިންސްގެ ހައިކޯ ސިޓީގައި ބޭއްވުނު 2026 ވަނަ އަހަރުގެ ޔުނައިޓެޑް ސިޓީސް އެންޑް ލޯކަލް ގަވަރމަންޓްސް އޭޝިއާ-ޕެސިފިކް (ޔޫސީއެލްޖީ އެސްޕެކް) ކައުންސިލް ބައްދަލުވުމުގައި، މާލެ ސިޓީގެ މޭޔަރު އާދަމް އާޒިމް އަދި މާލެ ސިޓީ ކައުންސިލްގެ ވަފުދުން ކާމިޔާބު މަސައްކަތްޕުޅުތަކަކާއި ބައިނަލްއަޤްވާމީ ގިނަ ބައްދަލުވުންތަކެއް ބާއްވަވައިފިއެވެ. މި ދަތުރުފުޅުގައި މާލެއަށް ލިބުނު އެންމެ ފާހަގަކޮށްލެވޭ އެއް ކާމިޔާބީއަކީ، 2027 ވަނަ އަހަރުގެ ޔޫސީއެލްޖީ އެސްޕެކް އެގްޒެކެޓިވް ބިއުރޯ ބައްދަލުވުން ފުރަތަމަ ފަހަރަށް މާލޭގައި ބޭއްވުމުގެ ފުރުޞަތު ކަށަވަރުވުމެވެ. މިއީ ސަރަޙައްދީ ފެންވަރުގައި މާލެ ސިޓީގެ ލީޑަރޝިޕާއި ނުފޫޒު ފުޅާވަމުން އަންނަކަން ހާމަކޮށްދޭ ތާރީޚީ ނިންމުމެކެވެ.
މި ކައުންސިލް ބައްދަލުވުމުގެ ތެރެއިން ކުރިއަށްދިޔަ "މެރިން އިކޮނޮމިކް ކޯޕަރޭޝަން އެންޑް ސަސްޓެއިނަބަލް ޑިވެލޮޕްމަންޓް އެކްސްޗޭންޖް" ފޯރަމްގައި "ބްލޫ ކޯޕަރޭޝަން ފޯ އަ ޝެއަރޑް ފިއުޗަރ" މި ޝިޢާރުގެ ދަށުން މޭޔަރު އާޒިމް ވަނީ ޚާއްޞަ ތަޤުރީރެއް ދެއްވާފައެވެ. މި ތަޤުރީރުގައި، ކުދި ޖަޒީރާ ސިޓީތަކަށް ދިމާވާ ގޮންޖެހުންތަކާއި، ދެމެހެއްޓެނިވި ކަނޑުގެ ވަސީލަތްތަކުގެ ތަރައްޤީއާއި، ގޮނޑުދޮށްތައް ހިމާޔަތްކުރުމުގެ މުހިންމުކަމުގެ މައްޗަށް އަލިއަޅުއްވާލެއްވިއެވެ. އަދި ބައިނަލްއަޤްވާމީ މިފަދަ ޕްލެޓްފޯމްތަކަކީ ކުދި ޖަޒީރާ މުޖުތަމަޢުތަކުގެ އަޑު އުފުލުމަށާއި، ތިމާވެށީގެ ނާޒުކު ހާލަތްތަކަށް ހައްލު ހޯދުމަށް މުހިންމު ބައްދަލުވުންތަކެއްކަން އެމަނިކުފާނު ފާހަގަކުރެއްވިއެވެ.
މީގެއިތުރުން، ޗައިނާއާއި ރާއްޖެއާ ދެމެދު އޮތް ގުޅުން ބަދަހިކުރުމުގެ ގޮތުން ހައިކޯ ސިޓީގެ ވައިސް މޭޔަރު ޑރ. ޓޮންގ ގުއިޗަންއާ ބައްދަލުކުރައްވައި، ފަތުރުވެރިކަމާއި، ވިޔަފާރިއާއި، ތަޢުލީމީ ދާއިރާއިން ގުޅުން ބަދަހިކުރުމަށް މަޝްވަރާކުރެއްވިއެވެ. ޚާއްޞަކޮށް އިޤްތިޞާދީ އަދި ސަގާފީ ގުޅުންތައް ފުޅާކުރުމުގެ ގޮތުން މާލެ އަދި ހައިކޯ ސިޓީއާ ދެމެދު ސީދާ ވައިގެ ދަތުރުތައް ފެށުމުގެ ފުރުޞަތުތަކާ ގުޅޭގޮތުން ދެބޭފުޅުން ޚިޔާލު ބަދަލުކުރެއްވިއެވެ.
މި ދަތުރުފުޅުގައި މޭޔަރު ވަނީ 7 ވަނަ ހިއުމެނިޓޭރިއަން-ޑިވެލޮޕްމަންޓް-ޕީސް (އެޗްޑީޕީ) ނެކްސަސް ކޮމިޓީގެ ބައްދަލުވުމުގައި ވެސް ބައިވެރިވެވަޑައިގެންފައެވެ. ސަރަޙައްދީ ގޮންޖެހުންތަކުން އަރައިގަތުމަށް ލޯކަލް ގަވަރމަންޓްތައް ގުޅިގެން މަސައްކަތްކުރުމަށް ބާރުއެޅި މި ބައްދަލުވުމުގައި، އާޓިފިޝަލް އިންޓެލިޖެންސް (އޭއައި) ގެ ދާއިރާއިން ބައިނަލްއަޤްވާމީ ފެންވަރުގައި އެއްބާރުލުން ދިނުމުގެ މުހިންމު ބަޔާނެއް ވަނީ ފާސްކޮށްފައެވެ. މީގެއިތުރުން، ޔޫސީއެލްޖީ އެސްޕެކްގެ މާލީ ކަންކަން ހަރުދަނާކޮށް ބެލެހެއްޓުމަށް ލަފާއަރުވާ މުހިންމު ކޮމިޓީއެއް ކަމަށްވާ ފައިނޭންޝަލް މެނޭޖްމަންޓް ކޮމިޓީގެ ޚާއްޞަ ބައްދަލުވުމުގައިވެސް މޭޔަރު ބައިވެރިވެވަޑައިގެންނެވިއެވެ.
ދަތުރުފުޅު ނިންމަވާލެއްވުމުގެ ގޮތުން، ތިމާވެށި ރައްކާތެރިކުރުމަށާއި ފެހި މާޙައުލެއް ބިނާކުރުމަށް ބާރުއެޅުމުގެ ގޮތުން ހައިކޯގެ ފެންގްޒިއަންގް ވެޓްލޭންޑް ޕާކުގައި ބޭއްވުނު ޚާއްޞަ ގަސް އިންދުމުގެ ހަރަކާތުގައި މޭޔަރު އާޒިމް ބައިވެރިވެވަޑައިގެންނެވިއެވެ. ޔޫސީއެލްޖީ އެސްޕެކްގެ ސެކްރެޓަރީ ޖެނެރަލް ޑރ. ބަރނާޑިއާ އިރަވަތީ ޗަންދްރަދޭވީއާއި އެހެނިހެން މަންދޫބުންނާއެކު ކުރިއަށްގެންދިޔަ މި ހަރަކާތަކީ ދެމެހެއްޓެނިވި އަދި ތިމާވެއްޓާ ރައްޓެހި މުޖުތަމަޢުތަކެއް ބިނާކުރުމަށް ސަރަޙައްދީ ފެންވަރުގައި އޮތް އެއްބަސްވުން ރަމްޒުކޮށްދިން ހަރަކާތެކެވެ.
