ހަތް ދުވަހުގެ ތެރޭގައި ހޮރްމުޒް ކަނޑުއޮޅިން ވިޔަފާރި އުޅަނދުފަހަރަށް އާންމު ދަތުރުފަތުރުގެ ފުރުސަތު ދިނުމަށް އީރާނުން ހުށަހެޅި ހުށަހެޅުމާ އެމެރިކާގެ ރައީސް ޑޮނަލްޑް ޓްރަމްޕް ދެކޮޅު ހައްދަވައިފިއެވެ. ވޮޝިންގޓަނާއި ތެހެރާނާ ދެމެދު އުފެދިފައިވާ ނުތަނަވަސްކަމުގެ ތެރޭގައި މި ނިންމުން ނިންމަވާފައިވާ ކަމަށް ވައިޓް ހައުސްގައި ނޫސްވެރިންނާ ވާހަކަދައްކަވަމުން ޓްރަމްޕް ވަނީ ވިދާޅުވެފައެވެ.
ޓްރަމްޕް ވިދާޅުވީ، ސްޓްރެޓީޖިކް ގޮތުން މުހިންމު މި ކަނޑުގެ ސަރަހައްދު ހުޅުވާލުމުގެ އެއްބަސްވުމަކަށް އީރާނުން އެދެނީ އެ ގައުމަށް ބޮޑެތި ފިއްތުންތަކެއް ކުރިމަތިވެފައިވާތީ ކަމަށެވެ. އަދި ”އަހަރެން އެމީހުންގެ ހުށަހެޅުމަށް އިންކާރުކުރަން،“ ކަމަށް ވިދާޅުވަމުން ޓްރަމްޕް ފާހަގަކުރެއްވީ އެ ކަނޑުއޮޅީގެ މައްސަލައިގައި އެމެރިކާ އޮތީ ވަރުގަދަ މަގާމެއްގައި ކަމަށެވެ.
އީރާނުގެ ޚާރިޖީ ވަޒީރު އައްބާސް އަރަގްޗީ ހުކުރު ދުވަހު ނިއުޔޯކުގައި ނޫސްވެރިންނަށް ވިދާޅުވީ، ބޭނުންވާ ޝަރުތުތައް ފުރިހަމަވެއްޖެނަމަ ހަތް ދުވަހުގެ ތެރޭގައި ހޮރްމުޒް ކަނޑުއޮޅިން ދަތުރުފަތުރު އަލުން ފެށުމަށް ތެހެރާނުން ތައްޔާރަށް އޮތް ކަމަށެވެ. އަދި މި ޝަރުތުތަކަކީ މިދިޔަ ޖޫން މަހު ދެ ގައުމުގެ ދެމެދުގައި އެއްބަސްވި ފަހުމުނާމާގައި ހިމެނޭ ކަންކަން ކަމަށާއި، މި ހުށަހެޅުން އެމެރިކާއަށް ފޯރުކޮށްދިނީ ގަތަރު މެދުވެރިކޮށް ކަމަށްވެސް އޭނާ ވިދާޅުވިއެވެ.
މި ހުށަހެޅުމުގެ ދަށުން އީރާނުން އެދިފައިވަނީ އެ ގައުމުގެ ބަނދަރުތައް އެމެރިކާއިން ބަންދުކޮށްފައި އޮތް އޮތުން ލުއިކޮށްދިނުމަށާއި، ތެލުގެ ވިޔަފާރިއަށް އަޅާފައިވާ ދަތިކުރުމުގެ ފިޔަވަޅުތައް އުވާލުމަށެވެ. މީގެއިތުރުން ފްރީޒްކޮށްފައިވާ އީރާނުގެ ފައިސާތައް ދޫކޮށްލުމަށާއި ހަމަނުޖެހުންތައް ހުއްޓާލުމަށްވެސް ވަނީ ގޮވާލާފައެވެ. އީރާނުގެ ރައީސް މަސްއޫދު ޕެޒެޝްކިއަން ވެސް ވިދާޅުވީ ޖޫން މަހުގެ ފަހުމުނާމާއަކީ ކުރީގެ ހާލަތަށް ކަންކަން ރުޖޫއަކުރުމުގެ އަސާސް ކަމަށެވެ.
ދުނިޔޭގެ ހަކަތައިގެ މައި މަގެއް ކަމަށްވާ ހޮރްމުޒް ކަނޑުއޮޅިން ކުރިން ދުނިޔޭގެ ތެލާއި ގޭހުގެ ގާތްގަނޑަކަށް ފަސްބައިކުޅަ އެއްބައި އުފުލައެވެ. ނަމަވެސް އެމެރިކާ، އިސްރާއީލް އަދި އީރާނުގެ އަސްކަރީ ކުރިމަތިލުންތަކާ ގުޅިގެން މި މަގު ބަންދުވެ، ދުނިޔޭގެ ހަކަތައިގެ ބާޒާރަށް ވަނީ ބޮޑެތި ލޮޅުންތަކެއް އަރާފައެވެ. ޓްރަމްޕްގެ މި ނިންމުމާއެކު މި ސަރަހައްދުގެ ވިޔަފާރި ދަތުރުފަތުރުގެ މުސްތަގުބަލު އަދިވެސް އޮތީ ނުނިމި، ކުރިއަށް އޮތް މަޝްވަރާތަކަށް ބަރޯސާވެފައެވެ.
