ދުނިޔޭގެ ފުޓްބޯޅައިގެ މައި އިދާރާ، ފީފާއިން ބައިނަލްއަޤްވާމީ ފިޔަވަޅުތަކާއި އަދަބުތައް ކަނޑައެޅުމުގައި ދެފުށް ދެގޮތް ސިޔާސަތެއް ގެންގުޅޭ ކަމަށް ތުހުމަތުކޮށް، ޖަރުމަނުގެ ޤައުމީ ޓީމުގެ ކުރީގެ މިޑްފީލްޑަރު މެސުތު އޮޒިލް ފީފާއަށް ވަރަށް ބޮޑަށް ފާޑުކިޔައިފިއެވެ.
ތުރުކީގެ އިސްތަންބޫލް ބަޝަކްޝެހީރުގެ އޮފިޝަލުންނާ އެކު، ވެރޯނާ ޔޫރޭޝިއަން އިކޮނޮމިކް ފޯރަމާ ގުޅުވައިގެން ކުޅުނު މެޗަކަށްފަހު ވާހަކަދައްކަމުން އުމުރުން 38 އަހަރުގެ އޮޒިލް ފާހަގަކުރީ، ދުނިޔޭގެ އެކި ކަންކޮޅުތަކުގައި ހިނގާ ހަމަނުޖެހުންތަކާ ގުޅިގެން ކުޅިވަރުގެ ތެރޭގައި ފިޔަވަޅު އެޅުމުގައި ބޮޑެތި ތަފާތުކުރުންތަކެއް ގެންގުޅޭ ކަމަށެވެ. އެގޮތުން، 2022 ވަނަ އަހަރު ޔޫކްރެއިނަށް އަރައިގަތުމާ ގުޅިގެން ރަޝިޔާގެ ޓީމުތަކާއި ކްލަބުތައް ބައިނަލްއަޤްވާމީ ހުރިހާ މުބާރާތްތަކަކުން ސަސްޕެންޑްކުރަން ފީފާއިން ވަގުތުން ފިޔަވަޅު އެޅި ނަމަވެސް، އޮކްޓޫބަރު 2023 އިން ފެށިގެން ޣައްޒާގައި ހިނގަމުންދާ ހަނގުރާމައާ ގުޅިގެން އިސްރާއީލުގެ ޓީމުތަކާ މެދު އެފަދަ އެއްވެސް ފިޔަވަޅެއް އެޅުމަށް އެ އިދާރާއިން ފަސްޖެހެމުންދާ ކަމަށް އޭނާ ބުންޏެވެ.
ފަލަސްޠީނުގެ ޙައްޤުގައި އަބަދުވެސް ވަކާލާތުކުރަމުން އަންނަ ކުރީގެ ކުޅުންތެރިޔާ ވަނީ، ކޮންމެ ޤައުމެއް އަދި ކޮންމެ ހަމަނުޖެހުމެއް މެދުވެރިވި ނަމަވެސް، ފުޓްބޯޅައިގެ އިދާރާތަކުން ހުރިހާ ފަރާތްތަކާ މެދުވެސް ހަމަހަމަކަމާ އެކު އަމަލުކުރުމަށް ގޮވާލާފައެވެ.
ފުޓްބޯޅައިގެ ފުޅާ ދައުރަށް އަލިއަޅުވާލަމުން އޮޒިލް އިތުރަށް ފާހަގަކުރީ، ނަސްލާއި ޤައުމިއްޔަތު އަދި ދީނީ ތަފާތުތަކަށް ބެލުމެއް ނެތި މުޖުތަމަޢުތައް އެއްބައިވަންތަކުރުމުގެ ބާރު ފުޓްބޯޅައަށް ލިބިފައިވާ ކަމަށެވެ. އެހެންކަމުން ވަކިވަކި ފަރާތްތަކަށް އަމާޒުކޮށްގެން ހޮވާލައިގެން ފިޔަވަޅު އެޅުން ހުއްޓާލައި، އިންސާފުގެ އާންމު ހަމަތައް ހިފެހެއްޓުމަށް އޭނާ ވަނީ ފީފާއަށް ގޮވާލާފައެވެ.
