ދިވެހިރާއްޖެއާއި ޕާކިސްތާނާ ދެމެދު ސިޔާސީ ގުޅުން ޤާއިމުކުރިތާ 60 އަހަރު ފުރުމުގެ މުނާސަބަތުގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އެ ޤައުމަށް ކުރެއްވި ފުރަމާނަ ދަތުރުފުޅު ނިންމަވާލެއްވުމަށްފަހު ރާއްޖެ ވަޑައިގެންފައިވާއިރު، އެ ދަތުރުފުޅުގެ ތެރެއިން، މާލެއާއި ކަރާޗީއާ ދެމެދު ސީދާ ވައިގެ ދަތުރުތައް ފެށުމަށް ނިންމާފައިވާކަން އިޢުލާނުކުރައްވައިފިއެވެ. މިކަން އިޢުލާނުކުރެއްވީ އިސްލާމްއާބާދުގައި ކުރިއަށްދިޔަ ’މޯލްޑިވްސް-ޕާކިސްތާން ބިޒްނަސް ފޯރަމް 2026‘ ގައެވެ.
މި ދަތުރުފުޅުގެ ތެރޭގައި ދެ ޤައުމުގެ ދެމެދުގައި ވިޔަފާރި، ޞިއްޙަތު، ތަޢުލީމު، ދިފާޢީ ދާއިރާ އަދި ފަތުރުވެރިކަން ހިމެނޭހެން މުހިންމު 20 ފަހުމުނާމާއެއްގައި ވަނީ ސޮއިކޮށްފައެވެ. މި އެއްބަސްވުންތަކުގެ މައިގަނޑު އަމާޒަކީ ދެ ޤައުމުގެ ދެމެދުގައި މިހާރު އޮތް 14 މިލިއަން ޑޮލަރުގެ ވިޔަފާރީގެ މުޢާމަލާތްތައް، ކުރިއަށް އޮތް ދެ އަހަރު ދުވަހުގެ ތެރޭގައި 200 މިލިއަން ޑޮލަރަށް އިތުރުކުރުމެވެ.
ފޯރަމްގައި ވާހަކަފުޅު ދައްކަވަމުން ރައީސް މުޢިއްޒު ވަނީ އިސްލާމިކް ފައިނޭންސްގެ ދާއިރާއިން ފަހިވެފައިވާ ފުރުޞަތުތަކަށް އަލިއަޅުއްވާލައްވައި، އިންވެސްޓްމަންޓްތަކަށް ހަރުދަނާ އޮނިގަނޑެއް ޤާއިމުކޮށްދެއްވާނެ ކަމުގެ ޔަޤީންކަން ދެއްވާފައެވެ. މީގެ އިތުރުން ފިނޭންސް މިނިސްޓަރު ޙަސަން ޒަރީރު ވަނީ ދަޢުލަތުގެ ދަރަނީގެ ގޮތުގައި 1.4 ބިލިއަން ޑޮލަރު ދައްކައި ޚަލާޞްކޮށްފައިވާކަން ފާހަގަކުރައްވައި، މާލީ ކަންކަން ހަރުދަނާކުރުމަށް ސަރުކާރުން އިސްކަންދޭ މިންވަރު ހާމަކުރައްވާފައެވެ.
ދެ ޤައުމުގެ ގުޅުން ބަދަހިކުރުމަށް މިފަދަ ބޮޑެތި އެއްބަސްވުންތަކެއް ޤާއިމުކުރަމުންދާއިރު، ރާއްޖޭގެ އެތެރޭގެ ދަތުރުފަތުރުގެ އަގުތައް އިންތިހާއަށް އުފުލުން ފަދަ ޢާންމު ދިރިއުޅުމާ ގުޅުންހުރި މައްސަލަތައް ހައްލުނުވެ ހުއްޓައި، ބޭރު ޤައުމުތަކާއެކު ވެވޭ އެއްބަސްވުންތަކަށް ސަރުކާރުން އިސްކަންދޭ މިންވަރާމެދު ބައެއް ޢާންމުންގެ މެދުގައި ވަނީ ކަންބޮޑުވުން ފާޅުކޮށްފައެވެ.
