އޯގާތެރި، އަދި ހުރިހާ އެންމެންނަށްވެސް ހަމަހަމަކަމާއެކު ފަސޭހައިން ޚިދުމަތް ހޯދޭނެ ފަދަ ވަރުގަދަ ނަފްސާނީ ސިއްހަތުގެ ނިޒާމެއް ބިނާކުރުމަށް ސަރުކާރުން ދޭ އަހައްމިއްޔަތުކަން، ދުނިޔޭގެ ނަފްސާނީ ސިއްހަތުގެ ދުވަހާ ގުޅިގެން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އަލުން ކަށަވަރުކޮށްދެއްވައިފިއެވެ.
ރައީސުލްޖުމްހޫރިއްޔާ އެކްސްގައި ޙިއްޞާކުރެއްވި މާނަފުން ޕޯސްޓަރާއި މެސެޖުގައި ވިދާޅުވީ، މި ނިޒާމު ބައްޓަންކުރެވެމުންދާނީ މިފަދަ ޚިދުމަތްތައް ބޭނުންވާ ފަރާތްތަކުގެ އަޑު އަހައި، އެ ފަރާތްތަކުގެ ތަޖުރިބާތަކަށް ރިޢާޔަތްކޮށް، ދިވެހި ރައްޔިތުންގެ ޙަޤީޤީ ބޭނުންތަކާ އެއްގޮތްވާ ގޮތުގެ މަތިން ކަމަށެވެ.
މި ޢަޒުމް ޙަޤީޤަތަކަށް ހެއްދެވުމަށްޓަކައި، ”މެންޓަލް ހެލްތު ސްޓްރެޓެޖިކް އެކްޝަން ޕްލޭން 2025–2029“ ގެ ދަށުން ސަރުކާރުން މުހިންމު މަސައްކަތްތަކެއް ކުރިއަށްގެންދަވާކަން ރައީސް ފާހަގަކުރެއްވިއެވެ. މީގެއިތުރުން ސިޔާސަތުތަކާއި ޤާނޫނީ އޮނިގަނޑަށް ގެންނަންޖެހޭ އިޞްލާޙުތަކުގެ ތެރެއިން، ޤައުމީ ފެންވަރުގެ ނަފްސާނީ ޞިއްޙަތުގެ ސިޔާސަތެއް އެކުލަވައިލުމާއި، ޖުމްލަ ފުރިހަމަ ނަފްސާނީ ޞިއްޙަތުގެ ޤާނޫނެއް (މެންޓަލް ހެލްތު އެކްޓް) ވުޖޫދުކުރުމުގެ މަސައްކަތްވެސް ކުރެވެމުންދާ ކަމަށް އެމަނިކުފާނު ވިދާޅުވިއެވެ.
ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ އެކްސްގައި ޙިއްޞާކުރެއްވި ޕޯސްޓު:
On #WorldMentalHealthDay, we reaffirm our commitment to building a compassionate, accessible and equitable mental health system, guided by the voices and lived experiences of those it serves, and tailored to the needs of our people. We are advancing this commitment through the Mental Health Strategic Action Plan 2025–2029, while working on policy and legislative reforms that include formulating a National Mental Health Policy and a comprehensive Mental Health Act. We are also improving access by integrating mental health into primary healthcare, strengthening regional and specialist services, and enhancing tele-mental health and crisis response systems. Our aim is to prioritise prevention and early intervention, ensure quality healthcare is within reach, and build a kinder and caring Maldives, one island, one community, and one honest conversation at a time. #WorldMentalHealthDay
— Dr Mohamed Muizzu (@MMuizzu) October 10, 2026
ނަފްސާނީ ޞިއްޙަތުގެ ޚިދުމަތްތައް ހޯދުމުގައި ހުރި ދަތިތައް ޙައްލުކުރުމަށް ސަރުކާރުން އަޅުއްވަމުން ގެންދަވާ ފިޔަވަޅުތަކަށް އަލިއަޅުއްވާލައްވަމުން ރައީސް ވިދާޅުވީ، ޕްރައިމަރީ ހެލްތުކެއާގެ ތެރެއަށް ނަފްސާނީ ސިއްޙަތުގެ ޚިދުމަތްތައް އެއްފަސްކޮށް، އަތޮޅުތަކާއި ސަރަޙައްދީ ފެންވަރުގައި ހާއްސަ ޚިދުމަތްތައް ފުޅާކުރެވެމުންދާ ކަމަށެވެ. އަދި ޓެލެ-މެންޓަލް ހެލްތުގެ ޚިދުމަތްތަކާއި، ކުއްލި ޙާލަތްތަކުގައި އަވަހަށް އިޖާބަދޭ ނިޒާމުތައްވެސް ހަރުދަނާކުރެވެމުންދާ ކަމަށް ބަޔާންކުރެއްވިއެވެ.
ރައީސް މުޢިއްޒު އިތުރަށް ވިދާޅުވީ، ސަރުކާރުގެ މައިގަނޑު އަމާޒަކީ ބަލިތަކުން ރައްކާތެރިވުމާއި، ކުރީބައިގައި ދެނެގަނެ ފަރުވާދިނުމަށް އިސްކަންދިނުން ކަމަށެވެ. އަދި ފެންވަރު ރަނގަޅު ސިއްޙީ ޚިދުމަތްތައް ފަސޭހަކަމާއެކު އަތްފޯރާފަށުގައި ލިބޭނެ މަގު ތަނަވަސްކޮށްދީ، ކޮންމެ ރަށެއްގައްޔާއި، ކޮންމެ މުޖުތަމަޢެއްގައި އަދި އެކަކު އަނެކަކާ ދެމެދު ދެކެވޭ އިޚްލާޞްތެރި ވާހަކަތަކުގެ ތެރެއިން، އޯގާތެރިކަމުން ފުރިގެންވާ ދިވެހިރާއްޖެއެއް ބިނާކުރުން ކަމަށްވެސް އެމަނިކުފާނު ވިދާޅުވިއެވެ.
ދުނިޔޭގެ ނަފްސާނީ ޞިއްޙަތުގެ ދުވަހާ ގުޅުވައިގެން ރައީސް އެކްސްގައި ޙިއްޞާކުރެއްވި މި މެސެޖާއެކު، ފުން މާނައެއް އެކުލެވޭ ޚާއްޞަ ކުރެހުމެއްގެ ޕޯސްޓަރެއްވެސް ވަނީ ހިމަނުއްވާފައެވެ.
